ఖైదీలకు దూరంగా వైద్య సేవలు?


హైదరాబాద్‌: జైళ్లలో ఖైదీలకు ఎప్పటికప్పుడు సరైన వైద్య సేవలు అందిస్తున్నామంటూ ఉన్నతాధికారులు చేస్తున్న ప్రకటనలు కేవలం పత్రికలకే పరిమితమవుతున్నాయి. ఆచరణలో ఆ మాటలు కనీసం మచ్చుకైనా కానరావడం లేదు. సబ్‌ జైలులో ఉన్న ఖైదీని పరిశీలించేందుకు ప్రతి 15 రోజులకు ఒకసారి డాక్టర్‌ వస్తారు. ఒకవేళ ఖైదీ ఎవరైనా ఆనారోగ్యానికి గురై వైద్య సేవలు అవసరమైతే 15 రోజుల పాటు ఆగాల్సిందే.

రాష్ట్రంలో ఉన్న 141 సబ్‌ జైళ్లలో ఉన్న ఖైదీల పరిస్థితి నానాటికీ తీసికట్టుగా తయారవుతుండగా, ఖైదీల్లో పెరుగుతున్న మరణాలు ఈ పరిస్థితికి రుజువుగా నిలుస్తున్నాయి. చాలా సబ్‌ జైళ్లలో జైలు ఆవరణలో డాక్టర్‌ను అందుబాటులో ఉంచే పరిస్థితి లేదు. ఖైదీ పరిస్థితి తీవ్రంగా మారితే అతనిని అధికార్లు స్థానిక ప్రాథమిక ఆరోగ్య కేంద్రానికి లేదా నర్సింగ్‌ హోంకు తరలిస్తారు.

ఆంధ్రప్రదేశ్‌లో ఏటా 120 నుంచి 130 మంది ఖైదీలు మరణిస్తున్నారని మానవహక్కుల ఫోరం (హెచ్‌ఆర్‌ఎఫ్‌) కార్యదర్శి కె.మురళి అన్నారు. ”అయితే, కర్ణాటక, మహారాష్ట్రలలో నమోదవుతున్న మరణాల సంఖ్య చాలా తక్కువ. తేడా ఏమిటంటే, ఖైదీలకు అందించే నాసిరకం వైద్య సేవలే” అని ఖైదీలకు అందుబాటులో ఉన్న వైద్య సేవలపై విస్తృతంగా అధ్యయనం చేసిన మురళీ చెప్పారు. వైద్యులకు నెలకు కేవలం రూ.750 మాత్రమే ఇస్తున్నందున చాలామంది జైళ్లలో సేవలందించేందుకు ఆసక్తి చూపడంలేదన్నారు. ”ఫలితంగా, చాలామంది వైద్యులు వారి విధుల్ని సక్రమంగా నిర్వర్తించడంలేదు” అని ఆయన వ్యాఖ్యానించారు.

ఎమర్జెన్సీ కేసుల విషయంలో రోగులకు స మయానికి తగిన రక్షణ కల్పించడంలో జైళ్ళ అధికార్లు విఫలమవుతున్నారన్నారు. ”ఏడాది కాలంలో సంభవించిన జైలు మరణాల్లో కనీసం ఐదుగురు హార్ట్‌ అటాక్‌తో మరణిస్తున్నారని, సమయానికి తగిన చికిత్స లభించకపోవడం ఇందుకు కారణం” అని ఈ హెచ్‌ఆర్‌ఎఫ్‌ సభ్యుడు అన్నారు.

ఖైదీలు తరచుగా జాండీస్‌ వ్యాధికి గురవుతున్నారన్నారు. అయితే, సబ్‌-జైళ్ళలో ఈ వ్యాధికి గురైన రోగులకు వైద్యులు సూచించిన ప్రకారం ఆహారం ఇవ్వడం జరగడం లేదని, వారు కూడా జైల్లోని ఇతర ఖైదీలకు ఇచ్చే ఆహారాన్నే తీసుకోవాల్సి వస్తుందన్నారు. కాగా, జైలు అధికార్లు ఈ ఆరోపణలను తిరస్కరించారు.

సబ్‌ జైలులో ఉన్న ఖైదీల సంఖ్య కేవలం 20 మాత్రమేనని, అందువల్ల పూర్తి స్థాయిలో వైద్యుల ఏర్పాటు సాధ్యం కాదని అన్నారు. ”ప్రతి ఏటా లక్షమంది వ్యక్తులకుగాను మన జైళ్ళలో మరణాల రేటు 0.07 శాతంగా ఉంది. అయితే, జైలు బయట (సాధారణ పౌరుల్లో) ఒక లక్షమంది వ్యక్తులలో ఏడు మరణాలు సంభవిస్తున్నాయి. సరాసరిన రాష్ట్రంలోని ప్రతి 300 మంది ఖైదీలకు ఒక వైద్యుడున్నారు” అని అదనపు ఇనస్పెక్టర్‌ జనరల్‌ (జైళ్ళు) పి నరసింహారెడ్డి చెప్పారు.

Advertisements

గైర్హాజరుపై అళగిరినే అడగండి: కరుణ


న్యూఢిల్లీ: యుపిఎ రెండవ విడత అధికారం చేపట్టిన సంవత్సరం తర్వాత తొలిసారిగా ఆదివారం రాజధాని సందర్శనకు వచ్చిన తమిళనాడు ముఖ్యమంత్రి కరుణానిధి స్పెక్ట్రమ్‌ వివాదంలో చిక్కుకున్న టెలికాం మంత్రి రాజాకు బాసటగా నిలిచారు. స్పెక్ట్రమ్‌ వివాదంలో రాజా రాజీనామా చెయ్యాలంటున్న ప్రతిపక్షం డిమాండ్‌లపై వ్యాఖ్యానించాలని అడిగినప్పుడు ”మీ అందరికీ ఏదో శుభవార్త చెప్పడానికి నేనిక్కడికి రాలేదు” అని ఆయన తమిళభాషలో వ్యంగ్యంగా అన్నారు.

ప్రధానమంత్రి మన్మోహన్‌సింగ్‌, కాంగ్రెస్‌ అధినేత్రి సోనియాగాంధీలతో ఆయన చర్చల సందర్భంగా ఈ అంశం ప్రస్తావనకు వస్తుందా అన్న ప్రశ్నను ఆయన దాటవేశారు. జూన్‌ నెలలో కోయంబత్తూరులో జరుగబోయే 9వ ప్రపంచ తమిళ సదస్సు ప్రారంభోత్సవానికి రావలసిందిగా ఆహ్వానించేందుకుగాను దేశాధ్యక్షురాలు ప్రతిభా పాటిల్‌ను కలుసుకున్న తర్వాత ఇక్కడున్న తమిళనాడు హౌస్‌లో కరుణానిధి విలేఖర్లతో మాట్లాడారు. మన్మోహన్‌, సోనియాలను ఆదివారం సాయంత్రం లేదా సోమవారం ఉదయం కరుణానిధి కలుసుకుంటారు.

స్పెక్ట్రమ్‌ కేసులో మంత్రి రాజాకు వ్యతిరేకంగా సిబిఐ వద్ద సాక్ష్యం ఉన్నట్లుగా ఒక వార్తాపత్రికలో వచ్చిన వార్తాకథనంపై మొత్తం విపక్షాలన్నీ పార్లమెంట్‌ కార్యకలాపాలను స్తంభింపజేసిన కొన్ని రోజుల అనంతరం రాజాపై ఆయన వ్యాఖ్యలు వచ్చాయి. ఆయన కుమారుడు, కేంద్ర రసాయనాలు, ఎరువుల మంత్రి ఎం కె అళగిరి వరుసగా పార్లమెంట్‌కు గైర్హాజరవడంపై వ్యాఖ్యానించాలని అడిగినప్పుడు ‘మీరు ఆయన్నే అడగండి’ అని కరుణానిధి ముక్తసరిగా బదులిచ్చారు. డిఎంకె అధినేతగా ఈ అంశంపై వ్యాఖ్యానించాలని ఒత్తిడి చేసినప్పుడు ”ముందు ఆయన అభిప్రాయమేంటో చెప్పనివ్వండి. తర్వాత నేను చెబుతాను” అన్నారు.

కల్లు పారుతోంది


గోపాల్‌పేట: ఉదయం నుంచి సాయంత్రం వరకు కాయకష్టం చేసి పేదోడు సేద తీరేందుకు తాగే కల్లులో పూర్తిగా కల్తీ ఉండడం వల్ల ఎప్పుడు ఏం జరుగుతుందోనని ప్రజలు తీవ్ర ఆందోళన చెందుతున్నారు. కల్తీకల్లు నివారణకు ప్రభుత్వం ఎన్ని చర్యలు తీసుకున్నా ఈత చెట్లు లేనిది స్వచ్ఛమైన కల్లెక్కడిదని ప్రశ్నిస్తున్నారు. ప్రజల బలహీనతను ఆసరాగా తీసుకొన్న కల్లు వ్యాపారులు అధిక మొత్తంలో విషపదార్థాలను వేయడం ప్రజల ప్రాణాలతో చలగాటమాడడం వంటి సంఘటనలు మండలంలో చోటుచేసుకుంటున్నాయి.

గతంలో గోపాల్‌పేటలో కల్లుడిపో ఉండి మండలంలోని అన్ని గ్రామాలకూ కల్లును సరఫరా చేస్తుండేవారు. ప్రస్తుతం కల్లు డిపో లేకపోవడంతో వనపర్తి నుండి కల్లు సరఫరా అవుతోంది. మండలంలోని కొన్ని గ్రామాలలో కల్తీకల్లు తయారు కావడం గమనార్హం. గ్రామాలలో తయారయ్యే కల్తీకల్లులో అధిక మొత్తంలో విష పదార్థాలను వేయడం, దానికి అలవాటు పడిన వారంతా తెల్లవారే సరికి కల్లు దుకాణాలకు వెళ్లి సీసా బదులు రెండు సీసాల కల్లు సేవిస్తున్నారు. కల్లులో వేసే డైజోఫాంకు అలవాటు పడిన వారంతా అధిక మొత్తంలో సేవించి బస్టాండు, పరిసర ప్రాంతాలలో నివసిస్తున్న వారి ఇళ్లముందు అపస్మారక స్థితిలో పడిపోతున్నారు. ఇలాంటి సంఘటనలు మండలంలో నిత్యకృత్యాలయ్యాయి.

అయినా సంబంధిత అధికారులు చర్యలు చేపట్టకపోవడం వల్ల వారిపై ఎన్నో అనుమానాలకు దారి తావిస్తోంది. గతంలో కల్తీకల్లు సేవించి గ్రామంలో ఇద్దరు మృతి చెందినప్పటికీ వ్యాపారులపై అధికారులు ఏమాత్రం చర్యలు చేపట్టకపోవడం విచారకరం. కల్తీకల్లే అమ్మకాన్ని ధ్యేయంగా పెట్టుకొని కొంత మంది వ్యాపారులు మండల ప్రజల ప్రాణాలతో చెలగాటమాడుతున్నారు. ప్రస్తుతం గ్రామాల్లోనే కల్తీకల్లు తయారవుతోంది.

ఇదేమని ప్రశ్నిస్తే తమ బతుకులు ఈకల్తీకల్లు మీదనే ఆధారపడ్డాయని వ్యాపారులే అనడం గమనార్హం. గ్రామాలలో అమ్మే కల్లు దుకాణాలు గ్రామాల మధ్య, చివరన ఉంటున్నాయి. ప్రస్తుతం కురుస్తున్న వర్షాలకు కల్లు దుకాణాలు అపరిశుభ్రంగా ఉంటున్నాయి. సీసాలపై ఈగలు, దోమలు వాలుతున్నాయి. ఈగలు వాలిన కల్లు సేవిస్తే అతిసార వచ్చే అవకాశాలు అధికంగా ఉన్నాయి. ఇప్పటికైనా అధికారులు వెంటనే స్పందించి గ్రామాలలో తయారయ్యే కల్తీకల్లు వ్యాపారులపై చర్యలు తీసుకొని ప్రజల ప్రాణాలను కాపాడాల్సిన అవసరం ఎంతైనా‚ ఉంది.

టీటీడీ అవినీతి వ్యవహారంపై దద్దరిల్లిన సభ


హైదరాబాద్‌: తిరుమల తిరుపతి దేవస్థానంలో జరుగుతున్న అవినీతి వ్యవహారంపై సోమవారం శాసనసభను కుదిపివేసింది. పాలకపక్షాల, ప్రతిపక్షాల వాదోపవాదాల మధ్య సభ వేడెక్కిపోయింది. టీటీడీ అవినీతి వ్యవహారంపై సభా సంఘాన్ని వేయాలని విపక్షాలు పట్టుబట్టాయి. అందుకు ప్రభుత్వం తిరస్కరించడంతో సభ నుండి టీడీపీ, పీఆర్పీ, టీిఆర్‌ఎస్‌, సీపీిఎం, బీజేపీి పార్టీలు ప్రభుత్వ వైఖరిని నిరసిస్తూ, సభ నుండి వాకౌట్‌ చేశాయి. సోమవారం శాసనసభలో తిరుమల తిరుపతి దేవస్థానంలో నగల అవినీతిపై పాలక విపక్షాలు సుదీర్ఘంగా చర్చించాయి. ముందుగా తెలుగుదేశం పార్టీ చర్చను ప్రారంభిస్తూ, ఇటీవల తిరుమల తిరుపతి దేవస్థానం వ్యవహారంపై ప్రపంచవ్యాప్తంగా ప్రజలు చర్చింకుంటున్నారని, ఇది కోట్లాది మంది హిందువుల మనోభావాలను దెబ్బతీసేవిధంగా ఉందని దీనిపై ప్రభుత్వం సభా కమిటీని వేసి విచారణ జరిపించాలని డిమాండ్‌ చేసింది. శ్రీవారి ఆభరణాలపై సమగ్ర సమాచారం ఇవ్వాలని, ఉత్సవ విగ్రహాలు విదేశాలకు వెళుతున్నప్పుడు అవి సరిగ్గా తిరిగి వస్తున్నాయా? లేదా? శేషాద్రిపై అనేక ఆరోపణలు వస్తున్నాయని అయినా అతన్ని ఇంకా పదవిలో కొనసాగించడంలోగల ఆంతర్యమేమిటని, దేవుని ఆభరణాలు తాకట్టుకు వెళుతుంటే రాష్ట్రంలో ప్రభుత్వం ఉన్నట్లా లేనట్ల్లా అనే అనుమానం కలుగుతుందని, వీటన్నింటికీ ప్రభుత్వం సమాధానం చెప్పాలని ప్రతిపక్ష నేత చంద్రబాబునాయుడు డిమాండ్‌ చేశారు. శ్రీవారిపై ప్రజలు ఎంతో నమ్మకం పెట్టుకున్నారని, వారి కోరికలు తీరడంలో శ్రీవారికి ఆభరణాలు, బంగారం సమర్పిస్తున్నారని, సమర్పించిన వస్తువులకు రక్షణ లేకపోవడంతో భక్తులు ఆందోళన చెందుతున్నారని అన్నారు. కాగా తిరుమలలోని ఆలయ నగల తాకట్టు ఒక వ్యవహారం మాత్రమేనని, ఇలాంటి వ్యవహారరలో అక్కడ కోకొల్లలని తీగలాగితే డొంకకదులుతుందని అందుకు సభా సంఘాన్ని వేయాలని ప్రజారాజ్యం పార్టీ అధినేత చిరంజీవి డిమాండ్‌ చేశారు. తిరుమలలో ఏమి జరగనట్లు ప్రభుత్వం భావిస్తోందని విమర్శించారు. అక్కడ ఏమీ జరగలేదని ప్రభుత్వం గుండెమీద చేయి వేసుకొని చెప్పగలరా? అని ఆయన ప్రశ్నించారు. ఏ వ్యవహారమైతేనేమి కోట్లాది మంది ప్రజల మనోభావాలను దెబ్బతీస్తుందని, వారిలో లేనిపోని అనుమానాలకు దారితీస్తుందన్నారు. దీనిపై నిగ్గు తేల్చాల్సిన అవసరం ప్రభుత్వంపై ఉందన్నారు. స్వామివారి ఊరేగింపులు భక్తులు వేసిన నాణేలు తగిలి డైమండ్‌ పగిలిపోయిందని చెప్పడం హాస్యాస్పందంగా ఉందన్నారు. 500 కోట్ల రూపాయల వ్యయంతో ఏర్పాటు చేసిన ఎస్పీ భక్తి ఛానల్‌ ప్రజలకు ఆశించిన మేరకు ఉపయోగపడకపోగ ఉద్యోగులకు మాత్రం భుక్త్తిి ఛానల్‌గా మారిందని చిరంజీవి ఎద్దేవా చేశారు. పాలకమండలి మొత్తం అవినీతిలో కూరుకుపోయిందని వెంటనే దానిని ప్రక్షాళన చేయాలని డిమాండ్‌ చేశారు. బీజేపీి పక్షం నేత జి.కిషన్‌రెడ్డి మాట్లాడుతూ, టీటీడీిలోని అవినీతి వ్యవహారం దేవాలయాల పవిత్రతను దెబ్బతీసేవిధంగా ఉందని విమర్శించారు. అవినీతి కుంభకోణాలతోపాటు అక్కడ అన్యమత ప్రచారాన్ని ప్రోత్సహిస్తున్నారని ఆరోపించారు. తమ పాపం ఎక్కడ బయటపడుతుందోనన్న భయంతో ప్రభుత్వం వ్యవహారాన్ని చర్చకు రాకుండా చూస్తోందని విమర్శించారు. నేడు దేవాలయాలు, పాలక మండళ్లకు, రాజకీయ నాయకులకు పునరావాస కేంద్రాలుగా మారాయని కిషన్‌రెడ్డి ఆవేదన వ్యక్తం చేశారు. ఆది కేశవులనాయుడు టీటీడీ ఛైర్మన్‌గా అయిన తరువాత టీటీడీ పవిత్రత పూర్తిగా దెబ్బతిన్నదని ఆరోపించారు. లోక్‌సత్తా నేత డాక్టర్‌ జయప్రకాశ్‌ నారాయణ మాట్లాడుతూ, టీటీడీలో అవకతవకలు ఉన్నమాట వాస్తవమన్నారు. దేవాలయాల ఆభరణాలు ఏ మేరకు ఉన్నాయి, అన్ని విషయాలపై ప్రజల్లో నమ్మకం కల్పించాల్సిన అవసరం ఉందన్నారు. ఆర్‌బిఐ, అప్రెజర్లు, జమాలజీ నిపుణులతో కమిటీని వేసి వారితో ఆభరణాల విలువలు లెక్కించాలన్నారు. విచారణ అనంతరం తప్పుచేసిన వారు ఎంతటివారినైనా శిక్షించాలని డిమాండ్‌ చేశారు. సీపీఎం నేత జూలకంటి రంగారెడ్డి మాట్లాడుతూ, టీటీడీ వ్యవహారంలో రాజకీయ జోక్యం ఉండకూడదన్నారు. టీటీడీ ఛైర్మన్‌గా రాజకీయ నాయకున్ని నియమించవద్దని, ప్రస్తుతం ఉన్న పాలకమండలిని రద్దు చేసి అవకతవకలపై సభా సంఘాన్ని వేసి విచారణ జరపాలని డిమాండ్‌ చేశారు. అనంతరం దేవాదాయ శాఖమంత్రి గాదె వెంకట్‌రెడ్డి మాట్లాడుతూ, రాష్ట్రంలోని దేవాలయాల ఆస్తుల పరిరక్షణకు తమ ప్రభుత్వం కట్టుబడి ఉందన్నారు. ఒక్క ఆలయంలో అర్చకుడు దేవుని వస్తువులు తాకట్టు పెట్టినంత మాత్రాన దానిని టీటీడీ మొత్తానికి అనుసయించడం సరికాదన్నారు. కేవలం దీనికోసమే సభా సంఘాన్ని వేయవలసిన అవసరం లేదని మంత్రి స్పష్టం చేశారు. అలాగే పాలకమండలిపై ఏ విధమైన ఆరోపణలు లేవని అలాంటప్పుడు దానిని రద్దు చేయాల్సిన అవసరం కూడా లేదన్నారు. అందుకు ప్రతిపక్ష నేత చంద్రబాబునాయుడు మాట్లాడుతూ, దేవుని ఆస్తులను అక్రమంగా కాజేయాలని చూస్తే ఎవ్వరూ బాగుపడరన్నారు. నగల వ్యవహారంపై సభా సంఘాన్ని వేయాలని డిమాండ్‌ చేశారు. అవసరమైతే పాలకమండలిని రద్దు చేయాలని అన్నారు. స్వామివారి కార్యక్రమాలు ప్రసారం చేయడానికి అనేక ఛానళ్లు సిద్ధంగా ఉన్నాయని, దీనికోసం ప్రత్యేకంగా ఛానల్‌ను ఏర్పాటు చేయాల్సిన అవసరం ఏముందని ప్రశ్నించారు. వీటన్నింటికీ ప్రభుత్వం నుండి సరైన సమాధానం రాకపోవడం, సభా సంఘానికి ప్రభుత్వం అంగీకరించకపోవడంతో విపక్షాలు సభ నుండి వాకౌట్‌ చేశాయి. దీనితో స్పీకర్‌ ఎన్‌.కిరణ్‌కుమార్‌రెడ్డి సభను రేపటికి వాయిదా వేశారు.

తడ చెక్‌పోస్టుపై ఏసీబీ దాడులు


నెల్లూరు: జిల్లా సరిహద్దుప్రాంతమైన తడ చెక్‌పోస్టు మీద గురువారం తెల్లవారు జామున ఏసీబీ అధికారులు విస్తృతంగా దాడులు నిర్వహించారు. రవాణా, కమర్షియల్‌ టాక్స్‌, అటవీ శాఖ, ఇలా ప్రధాన ప్రభుత్వ శాఖలకు చెందిన చెక్‌పోస్టులకు తడ కేంద్రంగా ఉంటుంది. ఈ క్రమంలో రోజు చెన్నై – కలకత్తా జాతీయ రహదారి మీద తడ చెక్‌పోస్టు మీదుగా సుమారు రెండు వైపుల 30 వేల లారీలు ప్రయాణిస్తాయి. వివిధ లోడ్‌లతో వచ్చిన ఈ లారీలను పరిశీలించి బిల్లులను సక్రమంగా తనిఖీ చేసి పంపించాల్సిన బాధ్యత ఇక్కడి అధికారులది కాగా లారీ డ్రైవర్ల నుంచి లంచాలు తీసుకుని లారీలను వది వేస్తున్నట్లు ఆరోపణలు వచ్చిన నేపథ్యంలో గురువారం తెల్లవారు జామున దాడులు నిర్వహించారు. పెద్ద మొత్తంలో ఏసీబీ అధికారులు ఈ సందర్భంగా సొమ్మును స్వాధీనంచేసుకున్నట్లు తెలుస్తోంది.

ఇందిరమ్మ అక్రమాల నేపథ్యంలో ఇద్దరు వర్క్‌ ఇన్‌స్పెక్టర్‌ సస్పెండ్‌


నెల్లూరు: నాయుడుపేటలో ఇందిరమ్మ గృహాలలో అక్రమాలు జరిగినట్లు రుజువు కావడంతో జిల్లా యంత్రాంగం బి.మస్తానయ్య అనే వర్క్‌ ఇన్‌స్పెక్టర్‌ను నెల్లూరు నుంచి పూర్తిగా విధుల నుంచి తొలగించడంతో పాటు అతని మీద క్రిమినల్‌ చర్యలు తీసుకోవడానికి రంగం సిద్ధం చేసింది. ఇతడితో పాటు మరో వర్క్‌ ఇన్‌స్పెక్టర్‌ను కూడా సస్పెండ్‌ చేయనున్నట్లు తెలుస్తోంది. అయితే సస్పెండ్‌ చేయనున్న వర్క్‌ ఇన్‌స్పెక్టర్‌ పేరును రాజకీయ ఒత్తిడిల నేపథ్యంలో గోప్యంగా ఉంచినట్లు తెలుస్తోంది. ఈ సంఘటనకు సంబంధించి నాయుడుపేట డిప్యూటి ఇంజనీర్‌గా ఉన్న రమణమూర్తిపై ఇంతకు ముందే సస్పెన్షన్‌ వేటు వేసిన సంగతి తెలిసిందే. ఏది ఏమైనా ప్రభుత్వం ఇందిరమ్మ గృహనిర్మాణ పథకంలో అవకతవకల మీద దృష్టి సారించడం లబ్దిదారుల్లో హర్షం వ్యక్తమవుతుంది.

అవినీతి నిరోధక శాఖ అంటే హడల్‌


ఏలూరు: ఆశ అనేది మనిషిని ఎంతకైనా తెగింపజేస్తుంది. ఆశ పడడంలో తప్పు లేదు. కానీ, ఆ ఆశ ఇతరులను ఇబ్బందులకు గురిచేస్తే ఆశపడ్డ వ్యక్తికి నిరాశ తప్పదు. ఇలాంటివే ఏసీబీకి పట్టుబడుతున్న కేసులు. ఏసీబీ దాడుల్లో పట్టుబడ్డ అధికారులను, ఉద్యోగులను గమనిస్తే దాదాపు అందరూ కొద్దిపాటి మొత్తానికి ఆశపడి తమ ఉద్యోగాలకు, జీవితాలకు ముప్పు కొనితెచ్చుకుంటున్నారు. ఇది స్వయంకృతాపరాధమే అని చెప్పవచ్చు. కేవలం లంచం సొమ్ము తీసుకుంటున్నప్పుడు పట్టుకోవడమే కాకుండా, అటువంటి వారు అక్రమంగా సంపాదించిన ఆస్తులపైనా అవినీతి నిరోధక శాఖ( ఎసిబి) దాడులు నిర్వహిస్తూ అక్రమార్కుల గుండెల్లో రైళ్ళు పరిగెట్టిస్తున్నారు.

ఇటీవల ముఖ్యమంత్రి డాక్టర్‌ వై.ఎస్‌. రాజశేఖరరెడ్డి ఎంతటి పెద్ద అధికారి అయినా అవినీతికి పాల్పడితే ఎసిబి అధికారులు ఉపేక్షించ వద్దని ఆదేశాలు జారీ చేశారు. కనుక ఎసిబి అధికారులు చిన్న చిన్న ఉద్యోగులను కాకుండా పెద్ద పెద్ద అవినీతి తిమింగళాల పై కూడా దృష్టి సారించాలి. కాగా జిల్లా వ్యాప్తంగా ఏసీబీ అధికారులు చేస్తున్న దాడులతో అక్రమార్కుల గుండెల్లో రైళ్ళు పరిగెడుతున్నాయి. ఇటీవలే ఏసీబీ డిఎస్పీగా ఉద్యోగ బాధ్యతలు స్వీకరించిన కె.సుదర్శన్‌రెడ్డి నేతృత్వంలో మొట్టమొదటి సారిగా జంగారెడ్డిగూడెం హాస్టల్‌ వార్డెన్‌ గొల్ల మరియరాజు ఇంటిపై శుక్రవారం దాడులను నిర్వహించి అరకోటి మేర అక్రమ ఆస్తులను గుర్తించారు.

గత ఏడాది కూడా అధికారులు దాడులు చేసి ఉన్నత స్థాయి అధికారులను పట్టుకోవడం జరిగింది. గత ఏడాదిలో ఏసీబీ దాడుల్లో పట్టుబడ్డవారి వివరాలు పరిశీలిస్తే… 2008 జనవరి 23వ తేదీన చెట్లు నరికివేతలో నష్టపరిహారంగా వచ్చిన రూ.19వేలు 250లు మంజూరు చేసేందుకు రాజమండ్రి ట్రాన్స్‌మిషన్‌ కన్‌స్ట్రక్షన్స్‌ ట్రాన్స్‌కో ఎఈగా పనిచేస్తున్న కె.కేశవ్‌ నల్లజర్ల సెంటర్‌లో రూ.మూడు వేలు లంచం తీసుకుంటూ పట్టుబడ్డారు. ఫిబ్రవరి 3వ తేదీన చాగ ల్లు తహసీల్దార్‌ డి.కోటేశ్వరరావు, 13వ తేదీన ఐటిడిఎలో మత్స్యశాఖ అధికారిగా పనిచేస్తున్న సంజీవరావు పట్టుబడ్డారు.

మే 2వ తేదీన ఏలూరు రేంజ్‌ ఫారెస్ట్‌ అధికారి ఎం.వి.వి. సత్యనారాయణమూర్తి, 16వ తేదీన పింఛను సొమ్ము ఇవ్వడానికి రూ.10వేలు లంచం డిమాండ్‌ చేసిన కొవ్వూరు సబ్‌ డివిజినల్‌ ట్రెజరీ అధికారి పి.రామశర్మ, 27వ తేదీన గుత్తేదారు నుంచి రూ.3వేలు లంచం తీసుకుంటున్న డిఆర్‌డిఎ అధికారి రాము పట్టుబడ్డారు. జూన్‌ 19వ తేదీన భీమడోలు పంచాయతీరాజ్‌ ఎఈ శ్రీనివాసరావు, 25వ తేదీన పెంటపాడు ఎస్‌ఐ షానవాజ్‌లు దాడుల్లో దొరికిపోయారు.

ఆదర్శ రైతులకు ఇచ్చే ప్రోత్సాహకాలు మంజూరుకు రూ.7వేల 500లు డిమాండ్‌ చేసిన పెనుమంట్ర వ్యవసాయాధికారి నేతల ఆంజనేయులు, నవంబర్‌ 5వ తేదీన రూ.రెండు వేల500లు లంచం తీసుకుంటున్న భీమవరం రూరల్‌ ఎస్‌ఐ జి.ఆర్‌.వి.వి.ఎస్‌.ఆంజనేయులు, 17వ తేదీన భూమి సర్వే చేసేందుకు రూ.రెండు వేల 500లు డిమాండ్‌ చేసిన జంగారెడ్డిగూడెం సర్వేయర్‌ యాదగాని వెంకటరమణ రూ.1500లు లంచం తీసుకుంటూ అధికారులకు పట్టుబడ్డారు.

ఇలా ఎంతో మంది అధికారులు ఎసీబీ దాడుల్లో పట్టుబడ్డారు. ఇక్కడ ఒక విషయం గమనిస్తే ఆశ్చర్యకరమైన విషయం బోధపడుతుంది. నెలనెలా ప్రభుత్వం నుంచి వేలాది రూపాయలను జీతభత్యాల కింద పొందుతున్న అధికారులు కేవలం కొద్దిపాటి మొత్తానికి ఆశపడి ఉద్యోగ జీవితానికి స్వయంగా నష్టపెట్టుకుంటున్నారు. ఏసీబీ దాడుల్లో పలువురు అధికారులు పట్టుబడుతున్నప్పటికీ, మిగితా అధికారుల్లో ఎటువంటి మార్పూ రాకపోవడం గమనించ దగ్గ విషయం. జిల్లాలో ఏసీబీ దాడుల్లో పట్టుబడి సస్పెండ్‌కు గురైన వారిలో అత్యధికంగా పెదవేగి మండలానికి చెందినవారు ఉన్నారు. గతంలో ఇక్కడ పనిచేసిన పలువురు తహసీల్దార్లు, ఎంపీడీవోలు సస్పెండ్‌ అయ్యారు. అధికారుల్లో ఎప్పటికైనా మార్పు వస్తుందో? లేదో? ఆ పైవాడికే తెలియాలి.